O Goberno di que a exclusión de inmigrantes sen papeis en Vich está condenada ao fracaso

José Luis Rodríguez Zapatero e dous pesos pesados do seu Goberno, a vicepresidenta primeira María Teresa Fernández de la Vega, e o ministro do Interior, Alfredo Pérez Rubalcaba, arremeteron con dureza onte contra a decisión do Concello barcelonés de Vich de negar o empadroamento aos inmigrantes irregulares. O presidente do Goberno sinalou que os inmigrantes sen papeis son «seres humanos» e, como talles, teñen «dereitos». Non quixo anticipar se o seu Goberno tomará algunha medida, pero adiantou que manterá unha postura «firme» á hora de defender a convivencia e a integración, que son as bases para «unha boa convivencia democrática». Outra política, engadiu, é «de curto alcance».

A vicepresidenta, á súa vez, desautorizou por terceiro día consecutivo a iniciativa do consistorio catalán. «Algún intento illado de orillar a legalidade, ignorando eses dereitos e esa vontade de integración de todos que a lei consagra e dando marcha atrás en conquistas que son conquistas de cidadanía, debe estar necesariamente condenado ao fracaso», afirmou Fernández de la Vega en Barcelona, tras reunirse co presidente José Montilla. A número dous do Goberno socialista sostivo que a súa opinión e non a actuación do equipo de goberno de Vich reflexa o «sentir da gran maioría dos cataláns, dos españois e dos europeos».

«Disparate»

Pérez Rubalcaba, como máximo responsable da política de inmigración, cualificou de «disparate» a controvertida reforma dos criterios do padrón en Vich. «Son o encargado de combater a inmigración ilegal e fágoo, consistentemente e ás veces con conflitos e é verdade que sacamos moitos inmigrantes ilegais, repatriámolos, pero negarlle a sanidade ou a educación aos fillos paréceme un disparate e unha barbaridade», afirmou. Mentres, a Generalitat descartou onte levar o asunto aos tribunais e deixou ao descuberto que Goberno central e Generalitat discrepan sobre como abordar a polémica.