España destacará a loita contra tráfico de menores durante a presidencia UE

(18/12/2009)

España destacará a loita contra tráfico de menores durante a presidencia UE
EFE , Madrid | 
A loita contra as redes de inmigración clandestina e de tráfico de menores de idade é un obxectivo prioritario da presidencia española da Unión Europea, afirmou hoxe en Madrid a secretaria española de Estado de Inmigración e Emigración, Consuelo Rumí.

En declaracións a xornalistas tras un acto conmemorativo do Día Internacional do Migrante, que se celebra este venres, 18 de decembro, Rumí sinalou que a presidencia española da UE, que abarcará o primeiro semestre de 2010, velará pola prevención, protección e retorno asistido dos menores non acompañados.

Rumí indicou que a integración social é fundamental para a recuperación económica e a saída da crise.

"Nin as mensaxes de dureza ou as apelacións paternalistas cara aos inmigrantes, ou as políticas radicais cara á inmigración en calquera das súas expresións, achegan nada para ordenar a chegada de persoas doutros países aos nosos nin favorece a convivencia", dixo.

Destacou que España viviu unha "transición á diversidade" de forma acelerada, o que se reflicte en que o 24 por cento dos nados neste país teñen un ou ambos os pais estranxeiros.

No mencionado acto, o director xeral da Organización Internacional para as Migracións (OIM), William Lacy, destacou os 50 anos da pertenza a ese organismo de España, país que considerou "porta de entrada" a Europa.

A OIM premiou, como gañador dun concurso de curtametraxes, ao ecuatoriano Pablo Vargas Hidalgo polo seu traballo "Mulleres entre dúas beiras", que relata, a través da historia de cinco mulleres, a realidade das ecuatorianas que un día decidiron afrontar o reto de abandonar o seu país e á súa familia para buscar fortuna en España.

No transcurso do acto, un grupo de activistas xuvenís irrompeu no escenario para protestar contra a nova Lei de Estranxeiría, en vigor desde o pasado 13 de decembro, baixo o lema "Infeliz día das persoas migrantes".

A OIM, da que forma parte España, é unha organización intergobernamental creada en 1951 e dedícase aos fluxos migratorios.