MARCOS CREO

 

A corporación de Rianxo aprobou por unanimidade nomear a Santiago Agrelo Martínez fillo predilecto e organizar un acto público de recoñecemento. Todos os grupos consideraron, no pleno celebrado este xoves, que existe sobrados argumentos para realizar esta distinción, destacando o seu compromiso coa inmigración.

Santiago Agrelo foi arcebispo de Tánxer desde o 2007 ata o 2019, cando se xubilou. Alí reclamou o dereito dos cidadáns a buscar un futuro mellor en Europa, as condicións do valo de Ceuta, os malos tratos policiais e as necesidades dos máis pobres. Tamén denunciou a existencia de mafias e reivindicou a implicación da Igrexa e as distintas relixións para solucionar o problema.

Non só esta proposta obtivo o respaldo unánime da corporación rianxeira, senón que o resto dos temas abordados durante a sesión tamén recibiron o apoio de todos os grupos. Así, deuse luz verde á firma dun convenio cos concellos de Dodro, Padrón, Rois e Valga para a xestión compartida dun servizo de condutas adictivas, orientado ao fomento de hábitos de vida saudables. As actuacións que se pretenden executar ata o 2025 teñen un orzamento de 140.000 euros e cada concello terá que achegar 7.000.

O pleno acordou declarar festivos locais do 2023 o 14 de xullo, coincidindo coas festas do Carmen, e o 15 de setembro, venres da Guadalupe. Tamén aprobou destinar 162.000 euros, do POS adicional da Deputación, a gastos de iluminación e subministración de enerxía.

Tamén de forma unánime, a corporación decidiu que o Concello de Rianxo se some a unha solicitude para que o antigo hospital provincial de Conxo leve o nome de Ramón Baltar e adhírase a un manifesto da Consellería do Mar contra o veto da pesca de fondo en 87 áreas de augas europeas.