O Goberno prevé aprobar este martes en Consello de Ministros a reforma do regulamento de estranxeiría, que flexibilizará as condicións de acceso ao mercado de traballo a miles de migrantes. Tamén o conclave ministerial prevé dar luz verde ao novo sistema de cotizacións dos traballadores autónomos, pactado con patronal e sindicatos, tal como confirman fontes do Ministerio de Inclusión e Seguridade Social. José Luís Escrivá logra sacar adiante dúas das normas de maior peso que leva traballando durante os últimos meses. A primeira non precisará de máis trámites e entrará en vigor unha vez se estableza no Boletín Oficial do Estado (BOE). E a segunda aínda deberá ser validada polo Congreso e para iso o ministro deberá armar unha maioría parlamentaria que a apoie.
A reforma do regulamento deseñada por Escrivá ampliará as posibilidades das persoas de orixe estranxeira para acceder a un emprego en España. Segundo os últimos datos da Seguridade Social referentes ao mes de xuño, un total de 2,3 millóns de traballadores en activo naceron fóra de España. Unha das novidades que introducirá o novo texto é a posibilidade de que calquera persoa que realice un curso de formación teña automaticamente permiso de traballo. É dicir, poderá compatibilizar os seus estudos cun contrato laboral e poderá mantelo o tempo que duren os seus estudos. Ata o de agora a visa de estudante non daba permiso de traballo.
Outra das modificacións que introducirá a norma é a elaboración dun "catálogo de profesións de difícil cobertura" para cada provincia ou demarcación territorial. Esta basearase nos datos remitidos desde o SEPE e deberá ser aprobado por patronais e sindicatos. E cando se identifique unha profesión sen persoal, abrirase a posibilidade de que as empresas traian a xente de fóra para traballar.
inmigracion@fegamp.es