O cemiterio parroquial de Calo, en Teo, cumpriu un século

(11/07/2022)

O cemiterio parroquial de Calo, en Teo, cumpriu un século

PACO RODRÍGUEZ

 

Foi promovido polos gandeiros do lugar e os emigrantes

10 jul 2022 .

Poucas parroquias de Galicia, e mesmo outras entidades de poboación similares de España, poden dicir que teñen un cemiterio particular e laico construído a iniciativa popular. É o caso da parroquia de Calou, no municipio de Teo , que acaba de conmemorar o centenario do seu camposanto. Inaugurouse o 30 de xuño de 1922, tras comezar a fraguarse no ano 1910, cando o promoveron a entón Sociedade de Agricultores e Gandeiros do lugar xunto con Residentes de Calo en Sudamérica.

Desa data son os primeiros contactos para adquirir o terreo e o nomeamento dunha comisión. O proxecto é do ano 1912, redactado por un dos arquitectos máis importantes de entón na área de Santiago, Jesús López de Rego. As obras duraron varios anos e o primeiro presidente foi Manuel Díaz Castro. Ata a actualidade houbo 13 responsables e o actual da Fundación Cemiterio Parroquial de San Xoán de Calo, que así se chama desde 2006, é Abel Barros Rodríguez, que encabeza unha directiva de oito persoas.

No ano 2004 promoveron a creación dun velorio e en 2015 una das obras que o presidente valora como «a máis importante dos últimos anos»: a construción de máis de 200 columbarios. Durante o seu mandato tamén promoveu a informatización dos datos dos titulares do cemiterio, ao redor de 1.100, e fixouse un horario de atención, así como cambiouse o sistema de iluminación do camposanto e do velorio para optar por luces led para aforrar. A propiedade no cemiterio está reservada para veciños de Calo ou outras persoas con vinculación familiar ou, ben, se alguén chega de fóra deberá levar cinco anos residindo na parroquia e estar empadroado no concello.