Maletas no aeroporto

 

A emigración sobe de novo en Bergantiños, Soneira e Fisterra, ademais de Cerceda. A baixada do ano pasado (moi pequena, pero baixada á fin e ao cabo, tras doce anos), primeira no cómputo xeral dos 16 municipios da zona nos últimos doce anos, foi só unha miraxe.

En todo caso, son sempre cifras de emigrados totais e iso inclúe as segundas xeracións e, de habelas, as terceiras, algo que ocorre moito en Sudamérica con quen se acolleron a un período transitorio para adquirir a nacionalidade, e tamén a familias asentadas en Suíza desde os anos sesenta e setenta.

«Aquí é doado atopar traballo en calquera sector»

Selene Papín Canosa é de Fisterra, ten 24 anos, e leva desde desde o 1 de decembro en Dublín, a capital de Irlanda, onde traballa nunha coñecida firma téxtil. O de viaxar non lle resulta descoñecido. Como relata, xa aos 19 anos foise a Londres para traballar como au pair. Foi aí onde descubriu o seu gusto polo inglés, e iso que pensaba que non se lle daría ben, pero sobre todo viu as oportunidades de traballo fóra de España, «que son inmensas, tanto que podes chegar a ascender en calquera empresa demostrando que traballas duro», asegura.