Galicia: Emigrantes retornados: nova vida en Vigo para 220 familias

(31/01/2022)

Galicia: Emigrantes retornados: nova vida en Vigo para 220 familias

Ana Blanco, segunda pola esquerda, co equipo da súa axencia recentemente creada.

A Rexión Internacional 31/01/2022 


Ao longo do pasado ano, polo menos 220 familias que ata o de agora vivían fóra de España, a maioría en América ou Europa, lograron axuda para poder iniciar unha nova vida en Vigo, en parte grazas a un paquete de axudas extraordinarias a emigrantes retornados.

Trátase dun total de 392.000 euros, segundo explican na Secretaría Xeral de Emigración, destinados a axudar aos gastos extraordinarios derivados da súa volta á cidade de Vigo para poder comezar un proxecto persoal na súa propia terra.

En paralelo, o mesmo departamento da Administración galega concedeu outras 36 subvencións de autoemprego para persoas que tras residir fóra de España durante un longo tempo decidiron retomar a súa vida na cidade. Neste caso foron 139.000 euros os aprobados para proxectos vitais que pasan por crear pequenas empresas, desde tendas a restaurantes ou mesmo axencias de comunicación.

No total de Galicia ascenderon a 8.153 os grupos familiares retornados que se sumaron ao devandito programa. Os motivos para o regreso varían desde “morriña” á terra ata profundas crises sociais, económicas e políticas nos países onde viviron ata o de agora, como pasou no caso de Venezuela.

Todas estas axudas están canalizadas a través das Oficinas Integrais de Asesoramento e Seguimento ao Retorno no acompañamento e axuda aos galegos do exterior que decidiron retornar a Galicia e comezar unha nova vida, á súa vez cofinanciadas polo Fondo Social Europeo.

Para iso contan con persoal técnico, xurídico e social especializado que se encarga de informar e asesorar aos galegos do exterior e favorecer o retorno, así como de acompañar aos galegos retornados e aos seus familiares. Este equipo tamén explica todos os programas da Secretaría Xeral da Emigración dirixidos á diáspora, e comunican os temas relacionados con educación, formación, laboral e social, e mesmo. No caso dos familiares con outra nacionalidade, tamén asesoran no campo da estranxeiría, ofrecendo apoio continuo, tanto presencial como telemático.

Proba do interese pola “operación retorno" é que se realizaron por parte das persoas interesadas en asentarse en Galicia un total 29.286 consultas relacionadas con temas educativos (escolarización de menores, formación regrada, formación para o emprego, homologación de estudos); sociais como asistencia sanitaria, autorizacións de residencia, axudas económicas, prestacións ou vivenda; ou laborais como información achega do emprego por conta allea ou axudas ao autoemprego.

Unha das persoas que recibiu axuda para un proxecto de autoemprego na súa propia cidade foi a nova xornalista Ana Blanco, quen se decatou da posibilidade de acceder a través da Oficina do Emigrante Retornado da Xunta en Vigo. “Alí informáronme do programa para axudar a mozos emprendedores que volven a Galicia despois de estar anos no estranxeiro. No meu caso cumpría con todos os requisitos, pedín a subvención e concedéronma”, explica.

“Fun en 2011 a traballar de voluntaria en Nacións Unidas e volvín”

Conta Ana Blanco que o obxectivo da súa axencia Rewire é que os seus clientes conten cun equipo de profesionais que os apoien no desenvolvemento das súas tarefas de comunicación. “Hoxe en día isto pode chegar a ser extremadamente complexo. Calquera campaña require expertos en desenvolvemento de contidos, deseño gráfico e dixital, xestión de redes sociais, desenvolvo web ou produción de vídeo. O noso valor engadido é que somos expertos en temáticas sociais e de desenvolvemento, e que temos capacidade de traballar en árabe, español, francés e inglés”, explica a nova xornalista “retornada”. Está convencida de que con estas bases e a axuda conseguida poderán ser competitivos en moitos mercados e traballar para organizacións de carácter global.

Canto tempo levaba fóra de España?

Funme de España no 2011 a traballar como voluntaria en Nacións Unidas. Ofrecéronme un posto en Paramaribo, a capital de Suriname (en Sudamérica). De aí mudeime a Tailandia, Afganistán e finalmente a Nova York. Despois de catro anos na sede traballando para o Programa de Nacións Unidas para o Desenvolvemento, mudeime a Finlandia e finalmente a Vigo cando empezou a pandemia.

En que consisten as axudas que recibiu ao regresar a Vigo?

Ademais dun monto económico, os que reciben as axudas teñen a opción de formar parte de Merlo, un programa de mentoring onde che asignan un titor para que te apoie no proceso de montar a túa empresa. No meu caso contei coa axuda dun mentor que me axudou a pensar en temas legais e financeiros a ter en conta á hora de montar a miña SL. A verdade é que ao ser recentemente chegada, estivo ben ter ese apoio. Sempre podes contratar unha xestoría, pero ao ser parte deste programa, podes falar dos temas que te preocupan e pedir consello ao teu mentor. Hai moita proximidade e empatía, o que se agradece cando estás a empezar.

Valeulle de moito?

Si. No meu caso, por mor de que tiña a alguén asesorándome desde o principio, puiden tomar decisións máis rápido o que me axudou a ter en conta cousas nas que, se cadra, ao principio, non pensas. A miña experiencia foi moi boa. Tamén para coñecer a outras persoas que están na miña situación. Tras dez anos convivindo con todo tipo de culturas, foi refrescante coñecer á comunidade internacional en Vigo. Faltan espazos que fomenten o intercambio de coñecemento entre empresarios pequenos. Noutros países tes aceleradores, invernadoiros, que están nas cidades, non no arrabalde. E iso dá lugar a que barrios se convertan en "hubs" de colaboración. Aquí aínda non atopei eses espazos.