Ata o de agora unhas 78.000 familias beneficiáronse desta axuda de 100 euros ao mes durante o primeiro ano de vida da ou do cativo que, en función das circunstancias de cada unidade familiar, pode prorrogarse ata os 3 anos.
A Xunta de Galicia facilita a presentación de solicitudes por parte das galegas e galegos retornados
Santiago de Compostela, 12 de xaneiro de 2022.
A Xunta de Galicia vén de publicar a orde que regula a concesión da Tarxeta Benvida para as nenas e nenos nacidos no 2022, axuda á que se poden acoller as galegas e galegos retornados que cumpran os requisitos.
O Goberno galego habilitou así un investimento de 32,2 millóns de euros para esta axuda de 100 euros ao mes durante o primeiro ano de vida da ou do cativo, que ten como obxectivo atender os gastos que supón ampliar a familia, como a compra de alimentos infantís, cueiros, roupa, berces e produtos de hixiene ou farmacia.
Nos seus cinco anos de existencia a Tarxeta Benvida supera un orzamento acumulado de 127 millóns de euros e chegou a máis de 78.000 familias. Isto supón que oito de cada dez nenas e nenos nacidos neste período tiveron acceso a esta medida. Para acceder á Tarxeta Benvida durante o primeiro ano a renda anual familiar deberá ser inferior aos 45.000 euros ou menor de 13.500 euros per capita.
Nos últimos anos esta prestación tivo varias novidades. En 2018, a Tarxeta Benvida estendeuse ata o terceiro ano de vida da nena ou neno para aquelas familias cunha renda anual igual ou inferior a 22.000 euros. Así, para o primeiro fillo ou filla concedíanse 600 euros anuais; para a segunda ou segundo 1200; e para a terceira ou terceiro e sucesivos, 2400.
Xa no ano 2019, habilitouse a posibilidade de que a Tarxeta Benvida se solicitase durante o embarazo, para que non fixese falta esperar ao nacemento para comezar os trámites. Deste modo, para as familias que escollen esta opción, o prazo medio de espera para obter esta prestación pasou de dous meses e medio a un mes.
E no ano 2020, o Goberno galego introduciu catro novidades: un complemento do 25% para as familias que vivan en concellos de menos de 5000 habitantes; un complemento para as familias numerosas, de xeito que as e os terceiros fillos e sucesivos perciban 2400 euros anuais desde o nacemento ata os tres anos; facilidades para a presentación de solicitudes por parte das galegas e galegos retornados; e a posibilidade extraordinaria de ampliar a Tarxeta Benvida ata os catro anos para as familias en situación de especial vulnerabilidade.
