Cabe destacar que, precisamente, entre as e os menores de 40 anos beneficiados por estas axudas, o 57% naceron en Galicia.
O 45% das emprendedoras e emprendedores que puxeron en marcha unha iniciativa empresarial fixérono nun concello do rural galego.
De 2018 a 2021 a Xunta de Galicia destinou 3 millóns de euros ao programa de Axudas ao Retorno Emprendedor
Santiago de Compostela, 13 de decembro de 2021.
O balance da Estratexia Galicia Retorna destaca que a idade media das emprendedoras e emprendedores retornados que solicitaron unha axuda a través da Secretaría Xeral da Emigración para a posta en marcha dunha iniciativa empresarial teñen unha idade media de 41,5 anos. O 49% do total ten menos de 40 anos.
A Xunta de Galicia destinou, dende 2018 a 2021, 3 millóns de euros a través das Axudas ao Retorno Emprendedor co obxectivo de facilitar a posta en marcha de 500 iniciativas empresariais de galegas e galegos retornados na comunidade autónoma.
Estas axudas forman parte das accións específicas da Estratexia Galicia Retorna que puxo en marcha a Secretaría Xeral da Emigración en 2018 e que se prorrogou por mor da covid-19 ao longo do presente 2021.
Entre os datos que cómpre destacar atópase o feito de que a idade media das galegas e galegos que retornan e poñen en marcha un proxecto empresarial solicitando unha destas axudas é de 41,5 anos, aínda que contamos con emprendedoras e emprendedores que van dende os 19 ata os 79 anos.
Ademais, cabe tamén facer referencia a que o 51,4% das e dos emprendedores retornados que solicitaron estas axudas naceron en Galicia e decidiron volver para poñer en marcha unha empresa ou unha iniciativa emprendedora. Entre as e os menores de 40 anos beneficiados por estas axudas, a cifra dos que naceron en Galicia crece ata o 57%.
Por outra banda, entre os datos obtidos do balance atópase que o 45% dos emprendedores e emprendedoras que puxeron en marcha unha iniciativa empresarial fixérono nun concello do rural galego.
Esta liña de subvencións ten como fin favorecer o retorno á nosa comunidade autónoma das galegas e galegos residentes no exterior de xeito que poidan fixar a súa residencia e integrarse social e laboralmente na sociedade, realizando nela as súas actividades empresariais e profesionais, favorecendo así o desenvolvemento do tecido empresarial de Galicia.
As axudas son de 5.000 euros, aumentables en 1.000 se a beneficiaria é muller e outros 2.000 se se pon en marcha nun concello rural.
