Nós tamén fomos emigrantes é o título da exposición que, ata o 26 de decembro, permanecerá a disposición dos veciños de Lousame na casa de cultura da localidade. Trátase dunha selección de 40 instantáneas, na súa maior parte retratos, que narran as circunstancias que levaron a varias xeracións a abandonar a súa terra en busca dun futuro mellor. A mostra enmárcase no programa Corrente cultural, que é unha aposta de Abanca e Afundación para impulsar a cultura por toda Galicia.

Desde o executivo lousamiano destacaron a importancia de que esta selección de fotos, unha das máis importantes de España sobre a emigración, recale no municipio. Os veciños poden visitala de luns a venres, de 9.00 a 14.00 e entre as 18.00 e as 21.00 horas, excepto os mércores, que só abre de mañá. Tamén estará a disposición dos veciños os domingos 21 e 28 deste mes, en horario de tarde, e o sábado 4 de decembro pola mañá. A idea é organizar visitas cos centros educativos.