A “Fundación Nosa Terra” promove unha iniciativa para que renderlle homenaxe aos máis de 8.000 galegos que participaron na construción da Canle de Panamá no ano 1904. Xusto no ano no que se cumpre o bicentenario da independencia de España (1821), a entidade con raíces fortemente arraigadas a Ourense, busca a colaboración institucional en Galicia para exaltar a figura dos obreiros galegos nun fito que posteriormente iniciaría a presenza galega no territorio nacional durante as décadas seguintes.
Francisco Sieiro, licenciado en Historia con estudos en doutoramento en Historia de América na Universidade de Santiago de Compostela e experto en Asuntos Migratorios, é directivo da fundación e descendentes de ourensáns, concretamente da parroquia de Feás (Boborás). Sinala que “fillos e netos de galegos buscamos así honrar xuntos, a eses emigrantes galegos, caracterizados pola súa entrega e dedicación ao traballo. A historia non foi xusta con eles”.
Referencias como os halagos do presidente estadounidense Roosevelt a contratar “a máis galegos xa que son traballadores excelentes” ou tamén as palabras do enxeñeiro John Frank Stevens, que estivo á fronte da obra, que dicía que “os galegos valen por tres”.
A Fundación formada por galegos e descendentes de galegos está “formada por persoas moi coñecidas en Panamá como Ricardo Gago, Ricardo Zanetti, Dorinda Cortizo, Daniel Pichel, Manuel Pico e Juan Carlos Barreiro, entre outros”.
"A meta prevista é o levantamento dun monumento que lembre a aqueles galegos"
O directivo de Nosa Terra comenta que “a meta prevista nun prazo de ano e medio é o levantamento dun monumento que lembre aos galegos que emigraron a Panamá pola construción da canle, no Centro de Visitantes de Auga Clara, na provincia de Colón”. Membros da fundación mantiveron contactos co administrador da Canle de Panamá, Ricaurte Vásquez e coa Xunta de Galicia, entre outros.
Francisco Sieiro di que “se buscará articular , xunto cos fillos e netos de galegos, non só o monumento se non tamén actividades para reforzar a galeguidade e o vínculo con Galicia para sentirse orgulloso”.
A razón principal da idea é a visibilidade da emigración e da importancia dos emigrantes na construción histórica. “Moita xente, tanto de Galicia como en Panamá descoñece a participación destes traballadores na construción da canle de Panamá. Ademais, a idea do monumento xorde de Manuel Pico e Juan Carlos Barreiro, que son descendentes de Carballiño e Forcarei, respectivamente. O avó de Juan traballou nas obras da Canle de Panamá e renderlle unha merecida homenaxe a eses traballadores, que se podían cualificar como heroes, é unha tarefa de todos, para que se faga xustiza e para non esquecer o seu labor e sobre todo que se difunda”.
