A Secretaría Xeral da Emigración publicará mañá, martes, 1 de xuño, a lista provisional de solicitudes admitidas e excluídas das Bolsas de Excelencia para a Mocidade do Exterior (BEME), co fin de que as e os solicitantes que sexan requiridos poidan aportar a documentación que se lles solicite. 

Deste xeito, as persoas provisionalmente excluídas disporán dun prazo de cinco días hábiles contados a partir do día seguinte ao da publicación nesta web, é dicir, a partir do día 2 de xuño, para que acheguen os documentos que se lles requiren. Transcorrido este prazo sen que se achegue dita documentación, considerarase que a persoa interesada desiste da súa solicitude.

A presentación da documentación que se lle require deberá realizarse de forma electrónica a través da aplicación informática establecida nesta convocatoria de bolsas no apartado de “subsanación”. 

Máis de 600 universitarias e universitarios galegos do exterior iniciaron a solicitude desta axuda para o estudo dun mestrado nunha das tres universidades galegas o próximo curso.

Esta é a quinta edición das bolsas BEME, que este ano contarán cun aumento de prazas ata chegar ás 200. O Goberno galego destina 1,72 millóns de euros impulsando a captación de universitarias e universitarios galegos e de currículo brillante, residentes no estranxeiro e cunha titulación de grao, licenciatura, enxeñaría ou arquitectura, que poderán cursar estudos de mestrado nalgunha das tres universidades galegas.