O vicepresidente primeiro da Xunta, Alfonso Rueda, presidiu, xunto ao secretario xeral da Emigración, Antonio Rodríguez Miranda, a Comisión Delegada do XII Consello de Comunidades Galegas durante a cal se avanzaron as novas iniciativas previstas pola Xunta para a promoción do Camiño de Santiago entre as galegas e galegos do exterior, co obxectivo de darlle un pulo ás entidades galegas que viron limitadas as súas actividades a causa da pandemia.

Deste xeito, tal e como explicou Alfonso Rueda ás e aos membros da Comisión Delegada, a Secretaría Xeral da Emigración crea este programa, "Conecta co Xacobeo", para o Ano Santo que permitirá desfrutar do Camiño a 200 persoas, a proposta das entidades galegas do exterior, en concreto, de España e Europa, con idades entre 18 e 64 anos.

As beneficiarias e beneficiarios percorrerán a pé os últimos 100 quilómetros do Camiño Portugués pola Costa ou da Vía da Prata en 6 etapas. Durante estes tramos, as e os participantes coñecerán o patrimonio cultural e natural das respectivas zonas polas que vaian pasando. O programa, que conta cun orzamento de 300.000 euros, desenvolverase nas dúas primeiras semanas de agosto. Durante esta reunión, tamén se explicaron o programa especial de Axudas de Emerxencia que será publicado no DOG nos próximos días e que estará dotado de 500.000 euros ao tratarse dun ano marcado pola covid-19. 

A Comisión Delegada

O órgano de representación permanente da colectividade galega que reside fóra da comunidade está conformado por doce entidades electas, catro representando aos galegos e galegas de América e do resto do mundo, catro que representan a Europa e outras catro que representan ás e aos galegos que residen nas comunidades autónomas españolas. A estas hai que engadir dúas entidades máis que teñen o carácter de membros natos por contar con máis de 20.000 persoas asociadas.

A Comisión, que se reúne con carácter ordinario alomenos unha vez ao ano, está presidida polo presidente da Xunta, Alberto Núñez Feijóo, presidente do Consello de Comunidades Galegas, e o vicepresidente é o secretario xeral da Emigración, Antonio Rodríguez Miranda.  Esta é a segunda ocasión na que se reúne esta Comisión no que vai de ano, dada a peculiaridade que estamos a vivir na actual situación de pandemia e de cara a facer, así, un seguimento da situación das e dos galegos do exterior, tal e como sucedeu no pasado 2020.