Vinte millóns de refuxiados por incendios e inundacións

(03/12/2019)

Vinte millóns de refuxiados por incendios e inundacións

España é o terceiro país de Europa, tras a República Checa e Grecia, con maior risco de que a súa poboación se vexa desprazada por desastres provocados polo clima

Oxfam alertou, coincidindo co inicio do cume de Madrid, que durante a última década os desastres provocados polo clima foron a principal causa de desprazamento interno a nivel mundial, obrigando a máis de 20 millóns de persoas a abandonar os seus fogares cada ano.

España é o terceiro país de Europa, tras a República Checa e Grecia, con maior risco de que a súa poboación se vexa desprazada por desastres provocados polo clima, asegura Oxfam Intermón tras analizar os datos dos dez últimos anos (2008-2018).

A difícil cuestión de proporcionar apoio financeiro ás comunidades, incluídas as desprazadas, que sufriron perdas e danos como resultado da crise climática, será un dos temas de debate da Conferencia das Nacións Unidas sobre o Clima que se inaugura hoxe en Madrid.

Nun documento titulado Obrigadas a abandonar os seus fogares, Oxfam sinala que, hoxe en día, é tres veces máis probable que as persoas se vexan forzadas a deixar as súas vivendas por ciclóns, inundacións ou incendios forestais que por conflitos, e ata sete veces máis que por terremotos ou erupcións volcánicas. É dicir, que os desastres provocados polo clima son a principal causa de desprazamento.

Aínda que ninguén é inmune -os incendios e inundacións que nas últimas semanas arrasaron Australia e Europa-, a análise de Oxfam mostra que as persoas en países pobres, que son quen menos contribuíron á contaminación, son as que se atopan en situación de maior risco.