A reforma do voto emigrante reactivará a batalla electoral no exterior

(02/11/2018)

A reforma do voto emigrante reactivará a batalla electoral no exterior

A previsión é que a diáspora vote xa nas europeas do próximo ano e nas autonómicas de 2020 sen ter que pedir a papeleta - Enviaráselles ao domicilio a documentación

Miguel G. Montero

 

 

 

O voto emigrante poderá ser decisivo de novo nas eleccións autonómicas de 2020. Para entón, a diáspora xa non terá que pedir a documentación electoral, disporá de prazos máis amplos para enviar a súa papeleta, será un proceso con máis garantías e de carácter gratuíto. A reforma do sufraxio exterior que botou a andar esta semana no Congreso eliminará as trabas ao dereito ao voto da emigración pactadas por PP e PSOE en 2011 ante as denuncias de fraude na diáspora. Vetaron a súa participación nas eleccións municipais e impuxeron a necesidade de rogar a papeleta en autonómicas, xerais e europeas.

O ter que pedir a documentación electoral en cada cita coas urnas fixo caer en picado a participación da diáspora -apenas chega ao 5% fronte a máis do 30% que alcanzaba antes da reforma- e en consecuencia os partidos xa non cruzaron o charco nin percorreron os países europeos en busca do cobizado voto emigrante. Pero nas próximas campañas, as axendas volverán estar cargadas de actos no exterior xa que o sufraxio da diáspora pode volver ser clave ao poder decidir escanos, como xa ocorreu en Galicia nas autonómicas de 2005. Ata entón o voto emigrante inclinábase polo PP, pero naquela cita resultou decisivo para que Manuel Fraga perdese a súa maioría absoluta, por só un escano, levantando así a San Caetano ao bipartito de PSdeG e BNG.

Os portavoces parlamentarios e técnicos na subcomisión do Congreso que traballa na reforma do voto emigrante, pola que se eliminará a obrigación de pedir a papeleta, teñen previsto finalizar os seus traballos en decembro co obxectivo de que para as eleccións do próximo ano -autonómicas nalgunhas comunidades e europeas- xa poida estrearse o novo sistema electoral para os residentes ausentes. En Galicia, os emigrantes poderán votar con esta nova fórmula que suprime o trámite de rogo, amplía os prazos, reforza as garantías e asegura a súa gratuidade nas autonómicas de 2020.

No arranque do debate do proxecto de reforma da lei electoral participaron ademais dos portavoces parlamentarios, técnicos dos Ministerios de Exteriores, Interior, Traballo e da Oficina do Censo Electoral. Coa proposta, segundo explica o portavoz socialista de Constitucional, Gregorio Cámara preténdese "mellorar e simplificar o procedemento de voto dos españois residentes no exterior, ampliando os prazos dos que dispoñen para exercer o seu dereito a voto, reforzando as garantías e asegurando a gratuidade do exercicio do dereito a voto".

Nas próximas citas coas urnas, os emigrantes recibirán no seu domicilio a documentación electoral con tempo suficiente para emitir o seu voto. A papeleta chegará a partir do décimo oitavo día posterior á convocatoria dos comicios, última data na que se actualiza o censo.

Como para esa data as candidaturas aínda non estarán proclamadas, a diáspora recibirá unha papeleta en branco, que deberán encher coa súa opción de voto. Outra das novidades é a ampliación en dous días do prazo previsto para votar en urna nas oficinas consulares, o que garante que todos os sufraxios cheguen a tempo para o seu escrutinio.

Esta nova fórmula garante a participación pero evítase volver ao sistema anterior que propiciaba bolsas de fraude.