(29/10/2018)
Vigo 27/10/2018
Levan anos pelexando por ser recoñecidos como españois de pleno dereito como os seus pais e os seus avós e estaban convencidos de que nesta ocasión as Cortes ían ter en conta as súas demandas coa tramitación da nova Lei de nacionalidade. Así llo prometeron aos descendentes de españois nados no estranxeiro a maioría dos grupos parlamentarios, pero co acceso ao Goberno, o PSOE cambiou de opinión, como denuncian os integrantes do Centro de Descendentes Españois Unidos (CeDEU). A proposición de Lei foi aprobada por unanimidade o 18 de xuño no Senado, pero coa chegada do texto ao Congreso para o seu debate, os socialistas presentaron unha serie de emendas que exclúen da posibilidade de obter a nacionalidade a varios supostos.
Estes serían os casos dos netos de emigrantes españois homes que tiveron que renunciar á nacionalidade de orixe en favor da do país de acollida; o dos netos de mulleres españolas emigrantes casadas con persoas doutra nacionalidade, independentemente de si elas mantiveron ou perderon a condición de españolas antes do nacemento dos seus descendentes, e o dos fillos que xa alcanzaran a maioría de idade cando aos seus pais lles foi recoñecida a nacionalidade española por razóns de orixe.
Ditas limitacións xeran notables desigualdades entre os descendentes dos emigrantes españois para acceder á nacionalidade dos seus devanceiros, segundo apunta a CeDEU, que estima que ata en 250.000 casos impediráselles poder contar con pasaporte español si prosperan as propostas socialistas.
O PSOE de Buenos Aires manifestouse incluso en contra das limitacións propostas agora polo seu partido no Congreso, crítica compartida por diversas agrupacións da emigración ou polo propio Consello de Residentes Españois na capital arxentina, que recalcan que a nacionalidade para os descendentes da diáspora é un dereito recoñecido pola Constitución.
Os colectivos da emigración piden ao PSOE que rectifique «este erro gravísimo», que practicamente limita a posibilidade de nacionalizarse a aqueles descendentes de emigrantes que perderon a súa condición de españois por non ratificala ao chegar á maioría de idade.
O Consello de Residentes en Buenos Aires chega a reclamar ao PSOE que revise a súa postura tras o acceso ao Goberno, «en lugar de agraviar e recortar os dereitos dos descendentes de españois, que representaron e representan un capital social que se está descoñecendo».
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas