A contratación de profesores de Relixión islámica durante o curso 2015-2016 continuará unicamente para os centros públicos de educación infantil e primaria, sen contemplarse para secundaria, en Andalucía, Aragón, Canarias, Cantabria, Ceuta e Melilla, onde é competencia do Estado. Así se desprende dun comunicado remitido polo subsecretario do Ministerio de Educación aos secretarios xerais da Comisión Islámica de España (CIE) con data de 30 de xullo do 2015, segundo informa o presidente da Unión de Comunidades Islámicas de España (Ucide), Riay Tatary.

«Exceso de horas»

No documento, o Ministerio indica que as propostas de contratación formuladas nos cursos académicos anteriores «enténdense automaticamente renovadas nos termos establecidos nos contratos en vigor».

Ademais, aclara que a cobertura de «novas necesidades» e o «exceso de horas» nun centro escolar compensarase coa diminución de horas doutro, non podendo incrementarse o global de horas autorizadas.

Así mesmo, ante posibles modificacións nas horas lectivas como consecuencia de cambios na lexislación dunha comunidade autónoma ou do número de alumnos que solicitan recibir ensino de relixión, o ministerio pide que se remita documentación justificativa dos centros que se propoñan incrementar ou diminuír as horas, indicando o motivo da variación da proposta. Unha vez recibida a documentación, a Subdirección Xeral de Persoal, deberá comunicar á Comisión Islámica de España os incrementos ou recortes de horas lectivas totais autorizadas, os centros educativos afectados e os criterios a ter en conta na proposta de modificación da contratación.

Aínda que a contratación de docentes para Relixión islámica é só para primaria desde hai anos, o anterior equipo do ministerio abriu a posibilidade de aumentalo a secundaria.