Bulgaria, Grecia e Turquía asinaron onte un acordo en Sofía para crear un centro de intercambio de información en tempo real, co obxectivo de frear a inmigración clandestina e o contrabando. O centro de colaboración policial e aduaneira situarase no posto fronteirizo de Kapitan-Andreevo, entre Bulgaria e Turquía, aínda que a súa creación queda pendente de que o acordo sexa ratificado agora polos parlamentos dos tres países.
É un dos problemas máis perentorios que comparten estes países con fronteiras comúns. Turquía acolleu a 2 millóns de inmigrantes, entre eles 1,7 millóns de refuxiados sirios, segundo datos facilitados polo ministro turco do Interior, Sebahattin Östürk, que lamentou que a Unión Europea só destine 300 millóns de dólares para afrontar os gastos que supoñen.
Bulgaria edificou un valo de 30 quilómetros e despregou policías para limitar a entrada de inmigrantes clandestinos procedentes de Turquía, unha medida insuficiente. Xunto con Grecia, o país enfróntase a unha explosión do número de inmigrantes rumbo a Europa Occidental e procedentes das zonas en conflito.