Os emigrantes retornados da comarca barbancesa están agora nun momento crucial. Nos próximos meses teñen que regularizar a súa situación, facer a declaración da renda deste ano e intentar recuperar o diñeiro que lles cobraron en multas. Desde as plataformas de afectados -na zona hai dous colectivos que aglutinan aos prexudicados polo cobro de sancións e intereses polas pensións do estranxeiro- están preocupados porque, por moito que acoden a Facenda, non logran ter toda a información que necesitan. E ven obrigados a recorrer a xestorías. O Goberno ten un plan en marcha para darlle unha información específica a este colectivo e que poida arranxar a súa situación. Nesa liña, garántese que na oficina de Ribeira haberá atención especial para os emigrantes retornados.