Decenas de inmigrantes protagonizan un novo intento de entrada a Melilla

(08/10/2014)

Decenas de inmigrantes protagonizan un novo intento de entrada a Melilla

A tentativa máis numerosa, protagonizada por uns 200 subsaharianos, produciuse sobre as 07.00 horas na zona do Río de Ouro, moi próxima ao posto fronteirizo de Mariguari


Escrito por:
Efe
08 de outubro de 2014



Decenas de inmigrantes protagonizaron hoxe un novo intento de entrada a Melilla a través do valo fronteirizo que separa a cidade autónoma de Marrocos, un obxectivo que, ao parecer, non conseguiu ningún deles.

Segundo informaron a Efe fontes policiais, a tentativa máis numerosa, protagonizada por uns 200 subsaharianos, produciuse sobre as 07.00 horas na zona do Río de Ouro, moi próxima ao posto fronteirizo de Mariguari.

Unha hora antes, sobre as 06.00, un grupo menos numeroso, de entre 20 e 30 inmigrantes, fora detectado nas proximidades doutro paso fronteirizo, o de Beni Enzar.

Ata o lugar desprazáranse numerosas patrullas da Garda Civil, reforzadas dende o aire polo helicóptero do instituto armado dedicado á vixilancia fronteiriza.

Non obstante, o maior grupo de inmigrantes, mentres os axentes se concentraban nunha zona sur do perímetro, encontrábase nun lugar situado máis ao norte, a uns seis quilómetros.

Estratexia «de distracción»

De acordo coas fontes, este dobre intento, case simultáneo, pode ser unha estratexia «de distracción» para que o grupo máis numeroso conseguise maior efectividade.

Ás portas do Centro de Estanza Temporal de Inmigrantes (CETI), decenas de subsaharianos concentráronse para seguir a ida e vinda de coches policiais, en tanto a estrada de circunvalación tivo que ser cortada por razóns de seguridade.

O último intento de entrada masiva de subsaharianos produciuse fai xusto unha semana, o pasado 1 de outubro, cando outros 200 subsaharianos o intentaron por unha zona do valo próximo ao aeroporto, sen que ningún conseguise entrar a Melilla.