Lalín. Ventosa rendeu de novo homenaxe aos emigrantes

(04/08/2014)

Ventosa rendeu de novo homenaxe aos emigrantes

03 de agosto de 2014 

Centos de persoas déronse cita onte na Festa do Emigrante na parroquia de Ventosa . M. Souto

Armados de carpas, os veciños de Ventosa non estaban onte dispostos a que o tempo lles aguase a festa e a parroquia foi escenario un ano máis dunha multitudinaria romaxe que naceu como homenaxe e festa de reunión de todos os emigrantes que por estas datas regresan de novo á terra para gozar das vacacións. Ás nove da noite de onte a música seguía soando e a festa estaba previsto que se prolongase, como vén sendo habitual ata altas horas da madrugada. Polbo, churrasco e viño estiveron a disposición de todos os asistentes que puideron degustar sardiñas gratis, a conta da comisión. As charangas Os Ardores e Viño Blanco encargáronse de animar a xornada e a eles engadiríase pola noite o grupo Azahara. A veterana romaxe cumpría onte medio século, que non é pouco. Unha data para non lla perder. Moitos onte xa collían sitio para outra celebración a que ten lugar os días 8 e 9 de setembro. Estes días no teleclub haberá tamén servizo de polbo, churrasco, pan e viño.