300.000 descendentes de exiliados lograron a nacionalidade española pola Lei de Memoria

(20/05/2014)

300.000 descendentes de exiliados lograron a nacionalidade española pola Lei de Memoria



Redacción, Madrid | 19 Maio 2014 - Crónicas da Emigración



O Goberno concedeu a nacionalidade española a 300.000 persoas que a solicitaron en virtude da coñecida como Lei de Memoria Histórica, que abriu a porta a que os descendentes de exiliados puidesen converterse en nacionais.

A disposición adicional sétima desa norma, aprobada en decembro de 2007, daba un prazo de tres anos para que os fillos de pai ou nai orixinariamente españois puideran solicitar a nacionalidade, e tamén permitía solicitala, sen fixar prazos, aos netos de quen a perderon ou tiveron que renunciar a ela como consecuencia do exilio.

Dende a entrada en vigor da lei, segundo explica o Goberno nunha resposta parlamentaria ao deputado a Amauir, Jon Iñarritu, á que tivo acceso Europa Press, o Executivo recibiu medio millón de solicitudes de nacionalidade. Delas, "300.000 xa foron concedidas, ao acreditarse os requisitos para adquirir a nacionalidade española," unhas 25.000 foron denegadas e o resto encóntranse en curso.

O deputado abertzale interesábase, en concreto, polas solicitudes presentadas en Cuba e a demora na súa resolución. O Ministerio de Xustiza, que se encarga destas xestións, infórmao de que na actualidade se encontran en trámite un total de 102.344 expedientes na illa caribeña.

Segundo o Executivo, neste caso o tempo medio de resolución ascende 18 meses, se ben este varía "considerablemente" en función de varios factores como a complexidade do expediente, se se require achegar documentación adicional e o Consulado Xeral onde se presente a solicitude.

Por exemplo, no Consulado Xeral da Habana presentáronse máis de 190.000 peticións de nacionalidade e o volume tamén é moi grande nos doutras cidades cubanas. "Iso supuxo que ante expedientes complexos ou que requirisen documentación adicional se estendese o tempo de tramitación", argumenta o Goberno.

Ademais, o departamento que dirixe Alberto Ruiz Gallardón apunta que a Lei de Memoria Histórica non estivo "acompañada dun incremento de medios persoais e materiais" para facer fronte ao procedemento que establecía para a concesión da nacionalidade española a fillos ou netos de exiliados.