(02/04/2014)
A UE e África comprometeranse contra a inmigración irregular ata o 2017
Martes, 1 de Abril de 2014
Bruxelas, 1 abril (EFE).- Os xefes de Estado e de Goberno da Unión Europea (UE) e África selarán un plan de acción contra a inmigración irregular para 2014-2017 no cumio bilateral que celebrarán mañá mércores e o xoves en Bruxelas.
"Comprometémonos a loitar contra a inmigración promovendo unha cooperación completa e eficiente para evitar as dramáticas consecuencias da migración irregular e protexer as vidas dos inmigrantes", sinalan os líderes no borrador da súa declaración conxunta sobre inmigración, ao que tivo acceso Efe.
A UE e África aseguran que nos próximos tres anos abordarán todos os aspectos relevantes deste fenómeno dende a prevención á xestión reforzada da inmigración e as fronteiras, o tráfico de inmigrantes, así como a súa devolución e readmisión.
Ambas as dúas partes pretenden atallar o problema dende a súa raíz e están decididas a prestar especial atención ao tráfico de seres humanos mediante "a cooperación en materia de prevención, protección e persecución de todos aqueles que se aproveitan de todas as formas de explotación, tanto en África coma en Europa,".
"Comprometémonos a reforzar o nexo entre a migración e o desenvolvemento", aseguran, ao tempo que citan medidas como a redución dos custos do envío de remesas aos seus países de orixe ou a consolidación do instituto africano de remesas.
Os líderes africanos e europeos, que declaran manter un espírito de "responsabilidade compartida", están de acordo tamén na necesidade de avanzar en materia de inmigración regular e mobilidade entre ambos os dous continentes.
Neste contexto, comprométense a reforzar a protección internacional mediante instrumentos para a protección de refuxiados, demandantes de asilo e persoas desprazadas.
"Recordamos que o respecto dos dereitos humanos fundamentais dos inmigrantes, sen importar o seu status legal, constitúe unha cuestión transversal da nosa cooperación", recalcan na súa declaración.
A UE mostrouse disposta a ofrecer financiamento aos países africanos no marco da loita contra a inmigración irregular, pero fontes comunitarias dixeron a Efe que non está previsto concretar ningunha cifra neste cumio.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas