Ecos do Sur ofrecerá asistencia médica en Lugo a persoas de toda a provincia que carecen de cobertura sanitaria no sistema público. A oenegué estenderá así o servizo sanitario que brinda desde principios de xaneiro nun local cedido polo Concello na Casa dás Asociacións María Mariño, situada na Rúa Monte Faro, xunto ao parque de Frigsa. «Imos publicitalo máis porque sabemos que en zonas como A Mariña, onde desenvolvemos o programa Afrodita para vítimas de trata, hai xente sen cartón sanitario que non coñece este recurso», detalla o asesor de Ecos Carlos Villar.
Un dos asesores de Ecos do Sur, Carlos Villar, explica que o 80% das persoas que se achegaron ao centro de atención sociosanitaria desde que entrou en servizo, a principios do 2014, si tiñan dereito a asistencia na sanidade pública.
-De xaneiro a marzo atendemos a 37 persoas. A maioría pensaba que non tiña cobertura no sistema público, pero no cribado inicial, que fan os traballadores sociais, viuse que si. Queremos publicitar o recurso a nivel de toda Galicia porque sabemos que si hai necesidade, pero é probable que o recurso non estea o suficientemente visualizado.
-¿Cal é o perfil dos usuarios que acudiron xa?
-A maioría son inmigrantes, sobre todo de países de Sudamérica. Incluso veu algún menor. Adoitan presentar doenzas que non necesitan unha intervención maior.