Polo momento e tal como anunciáranlle desde a Xunta aos representantes, os avisos non veñen acompañados de multas. Hai xa 55 días que non se ten constancia de peticións neste sentido, pero iso non significa nin moito menos que os pensionistas dean por finalizada a súa batalla posto que consideran que en moitos casos as tributacións que agora se lles esixen son indebidas e, ademais, as informacións transmitidas polos organismos públicos nos últimos anos ían no sentido de non realizar a declaración da renda e non no contrario, como agora sinala Facenda.

Os afectados neste caso, xunto cos preferentistas e outros colectivos moi heteroxéneos que van desde as asociacións contrarias ao cambio da lei do aborto ao sindicato Manos Limpias, participarán o próximo día 1 nunha manifestación polas rúas de Vigo que se prevé masiva. Para iso, os pensionistas retornados da Costa da Morte, que acudirán acompañados doutras agrupacións similares de toda Galicia, xa teñen previsto un servizo de autobuses, que partirán A Laracha (07.30 horas), Carballo (07.45), Cee (07.30) e Vimianzo (08.00). Os interesados en participar poden anotarse no 607 684 092.

Non ás homologacións

Os servizos xurídicos da asociación recomendan aos pensionistas que teñen recoñecida unha incapacidade de Suíza que non homologuen en España dita cualificación posto que, en virtude do convenio entre ambos os países, actualmente están exentos da declaración da renda, do mesmo xeito que os xubilados do sector público. As vantaxes da devandita homologación, como poden ser o acceso a aparcadoiros preferentes, non compensan os posibles prexuízos porque, tal como constataron desde a entidade, incapacidades do 100 % no país helvético supoñen, nalgúns casos, un recoñecemento inferior ao 10 % despois de pasar polos tribunais médicos españois.