(20/11/2013)
A distancia non foi un impedimento para que o espírito que preside calquera verbena galega contaxiásese por unha noite ao pequeno principado de Liechtenstein e incluso a algúns dos seus países veciños. Un pavillón de complexo nome, Spoerryhalle, no municipio de Schaan foi escenario o sábado pasado dunha festa que reuniu un ano máis -e xa van alá 16- á comunidade galega alí asentada e formada maioritariamente por xentes procedentes da Costa da Morte, como o muxián Manuel Figueroa, presidente do Centro Español Santiago Apóstolo.
Máis de medio milleiro de persoas, algunhas delas chegadas das cidades de Berna e Zúric tras pegarse unha boa enchenta de quilómetros, tomaron parte na cea coa que arrincou a velada. Pero ese número -xa maior que nas edicións precedentes- aumentou aínda máis cando chegou o momento de gozar da festa posterior. A orquestra Alaska Deluxe, que lidera outro muxián, Toni Otero, amenizou o arranque da celebración e, tras a actuación do cómico José Manuel Rodríguez Isi, encargouse de prolongar a festa ata as tres e media da madrugada. «Foi como actuar en Galicia, o ambiente era tan animado como o de calquera verbena das de aquí», aseguraba xa de volta en Galicia Otero para concluír sen dubidalo que, pese ao longo traxecto realizado -24 horas a ida e outras 20 a volta-, «valeu a pena».
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas