(08/11/2013)
A Comisión Delegada de Comunidades Galegas reúnese o próximo día 15 en Santiago
Redacción, Vigo | 06 Novembro 2013 -Cronicas da Emigración
A Comisión Delegada do Consello de Comunidades Galegas reúnese o próximo 15 de novembro en Santiago de Compostela co obxecto de facer balance das actuacións da Secretaría Xeral de Emigración no ano 2013, así como de presentar o documento coas liñas básicas do decreto sobre os órganos de representación do devandito Consello.
Durante a reunión, que comezará ás 10,00 horas, emitirase un informe sobre as liñas de axudas e subvencións que a Secretaría Xeral de Emigración programa para o ano 2014.
A Comisión Delegada reuniuse con carácter extraordinario o pasado 24 de xullo, tamén en Santiago de Compostela, e naquela ocasión os integrantes desta tiveron a oportunidade de expoñer o presidente da Xunta, Alberto Núñez Feijóo, os problemas que afectan á diáspora nas distintas zonas xeográficas ás que representan.
Naquela ocasión, en presenza do secretario xeral de Emigración, Antonio Rodríguez Miranda, analizouse preferentemente a Lei da Galeguidade e desenvolvéronse distintos puntos de dita Lei.
Á comisión do próximo día 15 acudirán, ao igual que aconteceu na anterior convocatoria, representantes da Xuventude de Galicia-Centro Galego de Lisboa, do Centro Cultural Galego de Frankfurt, do Centro Galego de Londres e do Centro Galego de Bruxelas, por Europa. Por América, estarán representados a Irmandade Galega de Venezuela, o Centro Galego de Montevideo, a Asociación Unión do Partido Xudicial de Ordenes en Bos Aires e a Sociedade Cultural Rosalía de Castro de Cuba. Por España, a Agrupación Cultural Saudade, o Centro Galego de Salamanca, a Agrupación Fillos de Galicia en Sestao e o Lar Gallego de Sevilla. Como membros natos, acudirá un representante polo Centro Galego de Bos Aires e outro pola Casa de Galicia de Montevideo.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas