Martin Schulz: 'Europa é un continente de inmigración'

(15/10/2013)

Martin Schulz: 'Europa é un continente de inmigración'

Presidente do Parlamento Europeo en Bruxelas. | Afp

Rosalía Sánchez | Berlín | El Mundo

luns 14/10/2013


O presidente do Parlamento Europeo e candidato socialdemócrata a presidir a Comisión Europea, Martin Schulz, esixe a modernización inmediata da lei migratoria europea tras as recentes catástrofes en Lampedusa (Italia) e Malta. Nunha entrevista concedida ao semanario alemán 'Der Spiegel, Schulz presenta unha axenda para reorientar a política europea cara aos 'sen papeis' baseándose nun argumento incontestable: "Europa é un continente de inmigración, iso é un feito, e debe dotarse lexislativamente para afrontalo.

Dende o punto de vista de Schulz, traxedias como a de Lampedusa poden evitarse. Para iso propón reforzar os controis fronteirizos e marítimos para que estas embarcacións non se acheguen á costa, ao mesmo tempo que se negocia cos países de orixe destes inmigrantes para que controlen a saída dos seus cidadáns. Considera que é necesario ofrecer máis oportunidades laborais aos inmigrantes 'sen papeis' para favorecer unha maior e máis rápida integración e sinala que actualmente caen nun círculo vicioso que comeza con que non teñen papeis, segue con que sen papeis non poden obter un traballo e sen traballo non poden obter papeis.

Un sistema común de inmigración

Schulz considera que Europa debe realizar unha repartición proporcional dos inmigrantes entre os 28 países membros da UE, a diferenza do modelo actual, na que os países polos que entran na UE os inmigrantes son os responsables da súa acollida. "Nin Italia nin Malta poden por si mesmas. Esta debe ser unha tarefa europea", suxire, e sinala que países como Alemaña, que non son fronteira exterior da UE pero son ricos e politicamente fortes, deben acoller máis emigrantes.

Schulz lamenta ademais que "nalgúns países europeos, certos partidos xogan cos medos da xente" con respecto a este asunto e asegura que Europa necesita "urxentemente" unha reforma da súa política migratoria que estableza un "sistema común de inmigración legal" equiparable co de Estados Unidos.

"Europa ten que recoñecer finalmente que é un continente perceptor de inmigración. Por iso necesitamos un sistema de inmigración legal. Todas as grandes rexións deste mundo, como Estados Unidos, Australia ou Canadá teñen leis modernas que regulan a migración legal," compara, insistindo en que só unha normativa destas características pode disuadir os "traficantes inmorais" de tratar de "facer negocio da desesperanza".