Sinalan que, despois das palabras do ministro Cristóbal Montoro e ante o rexeitamento por parte do PP no Senado a unha iniciativa para regularizar a súa situación, os emigrantes son «moi pesimistas» sobre os problemas deste colectivo.

Así, esta plataforma critica que o Goberno que preside Mariano Rajoy «trata aos emigrantes coma se fosen defraudadores», aplicándolles «multas abusivas e inxustas», a pesar de que hai poucos meses «aplicou unha amnistía fiscal a defraudadores profesionais multimillonarios que teñen o seu diñeiro en paraísos fiscais».

«Está claro que non somos todos iguais: aos ricos aplícaselles a lei con toda a benevolencia, e aos pobres, que viven dunha pensión gañada despois de moito esforzo lonxe do seu fogar, o Goberno deixa caer sobre as súas costas todo o peso da lei», critica esta coordinadora.

Reclamacións

Os emigrantes retornados, que demandan «o apoio da sociedade galega», solicitan ao Goberno central que se anulen todos os expedientes sancionadores instruídos pola Axencia Estatal Tributaria e que foron notificados nos últimos meses a persoas beneficiarias de pensións no estranxeiro por non tributar estas cantidades.

Tamén reclaman que se facilite a regularización da situación 2008-2012 «sen fixar para as persoas que se atopen esta situación recargas nin intereses de demora», así como iniciar unha campaña de información a todas as persoas afectadas para indicarlles as súas obrigacións tributarias futuras, «anulando os requisitos» relativos ao período inspeccionado.