Os departamentos de Benestar Social e Promoción Económica do Concello de Ames puxeron en marcha o programa Ames Integra. Trátase dun proxecto de formación e integración sociolaboral que está dirixido aos inmigrantes que residen no termo municipal. Terá un apartado de formación específica no que se enmarca un curso para obter o carné de manipulador de alimentos, un taller de lingua e cultura galega e a preparación dos exames en competencias crave. Tamén se lle prestará atención ao autoemprego, xa que é unha opción preferente dos colectivos con especiais dificultades de inserción.
As inscricións para formar parte do programa hai que formalizalas antes do xoves 10 de outubro cumprimentando unha solicitude que poderá entregarse na Casa do Concello (Bertamiráns) ou nas oficinas municipais de Milladoiro.
Por outra banda, onte botou a andar unha nova edición do programa Amessan, que este curso verá ampliado o número de actividades de prevención, promoción da saúde e dinamización para persoas maiores nas parroquias do municipio. Desta forma, e tras recoller opinións nas reunións mantidas a pasada semana cos veciños, o Concello programou cinco novos grupos en diferentes parroquias: catro de ludoteca cognitiva (Ameixenda, Bugallido, Cruxeiras e Tarroeira) e un de manualidades en Trasmonte.
Ata xuño
Amessan manterá as súas actividades ata o mes de xuño e este ano ofrece como novidade un novo taller denominado Achégate ao inglés. As inscricións, para as que fai falta unha copia do DNI, poden facerse o propio día no que comeza o programa ao longo desta semana.