Paula Prado, Marisol Soneira e Yolanda Díaz defenderán no Congreso as proposicións de lei sobre a modificación do voto exterior

(09/04/2013)

Paula Prado, Marisol Soneira e Yolanda Díaz defenderán no Congreso as proposicións de lei sobre a modificación do voto exterior

Redacción, Vigo - Cronicas da Emigración
| 09 de Abril de 2013



O Pleno do Parlamento Galego aprobou na súa sesión deste martes designar as deputadas Paula Prado (PP), Marisol Soneira (PSdeG) e Yolanda Díaz (AGE) para defender no Congreso dos Deputados as Proposicións de lei de modificación da Loreg no que se refire ao sufraxio do exterior, co obxecto de homoxeneizar o procedemento de voto dos residentes na diáspora co resto dos cidadáns.


Un total de 66 deputados dos 73 presentes na sala avalaron a designación das tres deputadas propostas para defender en Madrid as Proposicións de Lei coas que se pretende acabar coa baixa participación de españois no exterior nos comicios que se celebran en España, dende a entrada en vigor da reforma da Loreg no que se refire ao voto emigrante. A devandita reforma, que esixe aos emigrantes españois solicitar o voto para poder exercer o seu dereito ao sufraxio, leva implícito un procedemento de votación que entraña dificultades para axustarse aos prazos establecidos no sistema de voto do exterior.

Sete dos 73 deputados presentes na sala, todos eles do BNG, abstivéronse na votación, segundo explicou o voceiro nacionalista Francisco Jorquera, debido a que as propostas quedaron "caducas" e non se aclara" que o voto "teña que ser en urna". Por ese motivo, Jorquera pediu a retirada do proxecto.