Máis retornados, máis emigrantes

(05/02/2013)

Máis retornados, máis emigrantes

a voz

 

Autor:

Albino Prada

Data

 

Os datos debuxan un panorama desolador. Se xa é malo un incremento de 132.000 parados nun mes, a situación tórnase penosa cunha caída do dobre (263.000) de afiliados á Seguridade Social. E xa sabemos, como desvelou a EPA do último trimestre do 2012, que a diferenza debemos imputala tanto ao crecente número de persoas que perden o seu emprego e xa non teñen interese en inscribirse como demandantes como ao do de persoas que esgotan as súas prestacións.

Dos 132.000 novos parados só 7.200 son menores de 25 anos, e só 10.400, estranxeiros. Cuns elevadísimos niveis de paro xuvenil e de non nacionais, eses pequenos aumentos só poden explicarse polo retorno aos seus países duns, e pola emigración dos mozos. Talvez entón non chame xa a atención que nos últimos doce meses os parados rexistrados menores de 25 diminúan en 13.000 persoas, e os estranxeiros, en 18.000. E queda aínda por explicar o que sucede coa metade da poboación que perde o seu emprego (causa baixa na Seguridade Social) e non engorda o paro rexistrado. Son outras 131.000 persoas (mozas sobre todo) procedentes das contratacións estacionais de Nadal, condenadas a esperar ata o verán.

Sangría de afiliados

A Seguridade Social acusa unha sangría de afiliados que en termos interanuais só foi peor no 2009, duplicándose as caídas do ano pasado por estas datas. Con este panorama o cume hispano-alemá estudaba onte medidas para reducir o horrible desemprego xuvenil a través do modelo da formación profesional dual alemá. É unha reforma estrutural polo lado da oferta que podería dar resultado a medio prazo se as empresas se implican.

Pero a situación non está para esperar uns anos a ver que pasa. Se non se activa a demanda nacional e reláxanse os obxectivos de déficit e financiamento do sector público, o único plausible é que moitos dos nosos mozos emigren. Porque as empresas non van implicarse. Seguirán batendo marcas de baixas na Seguridade Social.