Jesús Mira reflexionou sobre Borges e o tango na Federación de Sociedades Galegas

(30/11/2012)

Jesús Mira reflexionou sobre Borges e o tango na Federación de Sociedades Galegas

Mariana Ruiz, Bos Aires - Crónicas da Emigración
 28 Novembro 2012 -


Jesús Mira durante a súa disertación. Acompáñao o presidente da Federación, Francisco Lores.

O recoñecido dirixente político e social Jesús Mira ofreceu, o venres 23, unha conferencia na Federación de Sociedades Galegas sobre "Borges e o tango". Alí, por espazo de máis dunha hora, foi profundando na particular relación do escritor arxentino coa música cidadá.

Neste sentido, Mira sinalou que, de acordo con testemuños recollidos por distintas fontes que entrevistaron ao notable escritor, cóntase que sobre a música cidadá, Jorge Luís Borges dixo: "...o tango non é a música natural dos barrios de Bos Aires, senón a dos bordeis. Eu sostiven sempre que o representativo é a milonga. A milonga é un infinito saúdo que narra, sen apuro, duelos e cousas de sangue; morte e provocacións; nunca gritona, entre conversadora e tranquila. Eu creo que a milonga é unha das grandes conversacións de Bos Aires, como o é tamén o truco, ese xogo de naipes dialogado e cheo de picardías".

Ademais, asegurou que "termina adquirindo un ton sentimental, sen dúbida o ton nostálxico do inmigrante europeo. A partir de aí comeza a ser materia poética dos arrabales. As zozobras do amor clandestino invaden as plumas dos autores populares e o tango transfórmase en burla, en rancor, en recriminación cara á muller infiel. Pasa entón a ser tango de desdicha e de queixume. Todo o trajín da cidade, todo o que move aos homes "a ira, o temor, o desexo, o goce carnal" é materia que motiva aos autores de tango. Eu creo que non sería disparatado afirmar que o tango é unha vasta expresión da inconexa comédie humaine da vida de Bos Aires".

Antes, no Salón Arturo Cadrado, a modo de benvida, o presidente da Federación, Francisco Lores Mascato, referiuse brevemente á traxectoria de Jesús Mira.