(19/10/2012)
Miras entrega a Medalla de Ouro da Emigración a Casa de Galicia de Uruguai
Álvaro Velázquez, Montevideo - 18 Outubro 2012 -Crónicas da Emigración
Un momento da firma entre o Fogar Español e as outras dúas institucións.
Casa de Galicia festexou os seus 95 anos nunha celebración que contou coa presenza do director xeral de Migracións, Aurelio Miras Portugal; o secretario xeral de Emigración da Xunta de Galicia, Santiago Camba; o embaixador de España, Roberto Varela; o cónsul, Eduardo de Quesada; o conselleiro laboral, Andrés González Charanga, autoridades uruguaias, directivos das institucións da colectividade, traballadores da mutualista e achegados á mesma.
Noventa e cinco anos non se cumpren todos os días. Á alegría dos festexos hai que agregarlle que se cumpren cargados de novidades e distincións que fortalecen aínda máis á institución.
Ao dirixirse aos presentes, Miras Portugal sinalou que "esta Casa de Galicia é un exemplo para a España de hoxe en día", en alusión a como puido rexurdir en momentos tan difíciles como os que atravesou, para logo informar que a ministra de Emprego, Fátima Báñez, concedera a Medalla de Ouro da Emigración a Casa de Galicia, afirmando que "tena ben merecida; a seguir traballando".
O secretario xeral de Emigración, Santiago Camba, resaltou o decoro e a forza que puxeron unha serie de persoas para que Casa de Galicia rexurdise, agradecendo a José Arijón e a Manuel Ramos, presidentes que sacaron adiante á institución en momentos de crise, xunto "ao equipo directivo e profesionais estupendos para que hoxe Casa de Galicia siga sendo un orgullo para todos os galegos", dixo.
O encargado de dar a medalla a un moi emocionado Manuel Ramos foi o embaixador de España, Roberto Varela, quen, á súa vez, resaltou o compromiso que asumira Casa de Galicia co Fogar Español. Ao recibir a medalla, Manuel Ramos sinalou que "recibo a medalla con honra, con orgullo, en nome de toda a xente de Casa de Galicia, de todos os galegos e de todos os centros galegos en Uruguai".
Casa de Galicia fundada en 1917 transcorreu os seus anos de vida con bos e malos momentos que soubo soportar, como a crise do ano 2002 que a afectou tan seriamente que moitos puñan en dúbida a súa continuidade como institución. Os presididos por Manuel Ramos souberon levar o barco a bo porto coa colaboración dos empregados, acredores, autoridades españolas e nacionais.
O xerente da institución, José Mouriño, apuntou as obras e cambio de tecnoloxía que vén levando adiante Casa de Galicia, renovando o servizo de diálese con novos aparellos, cambiando o tomógrafo e o angiógrafo e realizando obras no sanatorio para remodelar algúns servizos e mellorando as policlínicas zonais.
O Fogar Español asinou un convenio coa Casa de Galicia e a Asociación Española
A celebración non quedaría aí. A guinda púxoa o convenio que asinaron Benito Grande, presidente do Fogar Español; Manuel Ramos e José María García, presidentes de Casa de Galicia e a Asociación Española; polo que o Fogar ofrece o uso de salas das súas instalacións para ser usadas nun número de 20 pola Asociación Española e 10 por Casa de Galicia, podendo incrementarse o número en caso de ser necesario. Isto dará outro empuxe aos directivos do Fogar, que, deste xeito, verán reducido o déficit da institución.
Para o presidente, Benito Grande, a firma deste convenio "é un feito que sobresae na historia do Fogar. O Fogar Español necesita ingresos para poder soportar os gastos de 170 residentes que probablemente cheguen a 200 a fin de ano e que hoxe teñen un custo moi elevado".
Miras Portugal, presente na firma do convenio, informou de que se enviou unha partida de diñeiro, dando instrucións á Consellería Laboral para que fose utilizada no Fogar Español e os máis necesitados. Noutra orde, sinalou que por actitudes como a firma do convenio entre estas institucións iniciouse un proceso para conceder unha medalla de ouro da emigración á Asociación Española, resaltando que "son moi poucas as que hai, son moi poucas as que se dan, pero non todos os sitios chámanse Uruguai, chámanse a Española ou Casa de Galicia", indicou, baixo o aplauso dos presentes na firma.
Finalmente, o presidente da Asociación Española, José María García, expresou o seu desexo de que este convenio sirva ás tres institucións e "que sexa a primeira semente na unión da colectividade". Así se espera que suceda e que dea o respiro necesario nas economías do buque insignia da colectividade, como o é o Fogar Español.
Por todo o exposto foi unha celebración que tivo todos os condimentos para ser recordada non só polos integrantes de Casa de Galicia senón de toda a colectividade.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas