(10/08/2012)
A odisea de obxectar en sanidade
Médicos e enfermeiros encóntranse con trabas para poder atender a inmigrantes sen papeis
Sanitarios e axentes da Garda Civil atenden a un mozo chegado nunha pateira. / a opinión
O Consello de Enfermería xa alertou onte aos profesionais deste ramo de que é "inviable xuridicamente" dar cobertura sanitaria aos 'sen papeis' se o prohibe a lei. Iso si, fóra da súa xornada laboral propoñen habilitar consultas para atendelos de forma altruísta
AGENCIAS| MADRID O número de sanitarios que queren declararse obxectores e atender aos inmigrantes sen papeis malia que o Ministerio de Sanidade os exclúa do sistema non deixa de crecer. Iso si, médicos e enfermeiros non o terán nada doado. Se o pasado mércores eran os facultativos os que recoñecían que haberá dificultades para someter estes doentes a certas probas ou para coñecer o seu historial médico ao quedar as súas tarxetas desactivadas, onte era o Consello de Enfermaría o que poñía trabas á obxección.
Os servizos xurídicos do Consello Xeral de Enfermaría advertiron onte sobre a "inviabilidade xurídica" da figura da obxección de conciencia ante casos de non beneficiarios da asistencia sanitaria en España. Por iso, tratar inmigrantes en situación irregular pode ser considerado como "desobediencia civil ou insubmisión" con todas as consecuencias xurídicas, xudiciais e laborais que isto leva consigo, sinalan os seus representantes. Dende o Consello aclárase que o Ministerio de Sanidade é a única entidade estatal con plena competencia para decidir e determinar que persoas poden acceder ás prestacións sanitarias con cargo aos fondos públicos. Por iso, conta coa potestade de acudir ao Estado de Dereito e así facer cumprir as devanditas normas se non se acata a obriga dos sanitarios de seguilas.
De todos os xeitos, o Consello confirma que vai propoñer aos colexios provinciais, a través da súa Asemblea Xeral, a posibilidade de establecer consultas de enfermaría nas súas sedes "para que estes enfermeiros poidan prestar de forma altruísta, e fóra da súa xornada laboral, a súa asistencia sanitaria a esta poboación afectada,".
Por outra parte, onte continuaron as mostras de rexeitamento á proposta do Goberno de deixar sen cobertura sanitaria aos inmigrantes irregulares. A Asociación Xeral de Consumidores, Asgeco Confederación considera que as últimas medidas anunciadas polo Ministerio de Sanidade "se ceban" coas persoas máis vulnerables, e pediu ao Goberno que as reconsidere. Segundo a entidade, isto supón "un paso máis cara ao fin da gratuidade e universalidade dun dos piares do noso Estado de Benestar".
Na mesma liña, a voceira do Grupo Socialista no Congreso dos Deputados, Soraya Rodríguez, avisou onte a ao Goberno central de que a saúde non pode "mercantilizarse e lembrou que está "a romper" o principio da universalidade da sanidade coas medidas de recorte sanitario que está a aplicar. "Estas medidas están a afectar de forma directa aos colectivos máis vulnerables e con risco de exclusión social", sinalou e que, segundo puntualizou, "conviven" todos os días cos cidadáns españois.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas