O transfondo de case todos os casos é a insoportable crise, pero o perfil do novo emigrante é difícil de definir, xa que varía bastante. Hainos novos que se van de casa por primeira vez, pais de familia que pensaron que o seu regreso a casa era xa definitivo e tiveron que volver marcharse, ou estranxeiros que chegaron á Coruña en busca de traballo e, visto o panorama actual, prefiren volver ao seu país de orixe.
Segundo Diego Varela, doutor pola London School of Economics e profesor asociado á Universidade da Coruña, estas cifras «poden ter efectos moi graves, xa que representan unha perda de capital humano para a provincia». Aínda que Varela cre que non bastan os datos destes últimos anos para catalogar á Coruña como unha provincia emigrante, «a recesión en provincias como A Coruña é máis grave que en Madrid ou Barcelona. Están a deteriorarse as condicións de vida e isto pode acabar significando unha prohibición de traballar, especialmente para os máis novos», afirma Varela.
Incidindo no problema do paro xuvenil, o profesor cre que agora a xente «está disposta a superar as barreiras existentes -idiomáticas, culturais ou familiares-» en busca dun futuro mellor.