- O acto ten lugar cada ano no Instituto Cañada Blanch, un referente de recoñecida excelencia no ámbito educativo.
O secretario xeral da Emigración, Santiago Camba, vén de participar no ‘Día da Galicia Exterior’ de Londres, organizado cada ano polo Centro Galego da capital británica, fundado no ano 1968 e que na actualidade preside Nicolás Miño.
Esta actividade lúdica e de confraternidade reúne a unha parte considerable das numerosas colonias galega e española residentes naquela cidade, e ten lugar no Instituto Español Cañada Blanch, na zona de Westminster, un centro educativo con recoñecida excelencia, e enclave de especial simbolismo para a diáspora española.
Vicente Cañada Blanch, empresario valenciano afincado en Londres, foi un benefactor das e dos emigrantes galegos e españois en Inglaterra, e deixou no seu testamento un fondo económico destinado a manter o Instituto Español que leva o seu nome, e que arestora é un exemplo para o estudo do español en Londres, e o centro educativo por excelencia para os fillos, fillas, netos e netas da colectividade española.
Recordo permanente
Na súa alocución, Santiago Camba gabou a pegada dos galegos e as galegas en Londres, e a capacidade de respecto e absorción de novas culturas da sociedade británica. Tamén fixo fincapé na necesidade de afondar nas relacións internacionais nestes tempos de incerteza no ámbito financeiro, e sinalou que o Goberno autonómico “nunca esqueceu, nin esquecerá xamais” aos galegos e ás galegas da diáspora.
Ao acto acudiron, ademais do secretario xeral da Emigración da Xunta de Galicia, diversas autoridades locais e representantes de entidades galegas e españolas no Reino Unido, e tamén o director xeral de Migracións do Goberno Central, Aurelio Miras.