AXENCIAS| MADRID A crise que vive España provocou que moitos españois tivesen que saír fóra a buscar novas oportunidades laborais e que os inmigrantes teñan que recibir axudas desde os seus lugares de orixe, o que propicia unha alza das remesas enviadas ao país, convertido nun gran receptor. Segundo o Instituto Nacional de Estatística, no primeiro trimestre, 132.535 persoas, das que 27.004 eran españolas e 105.531 estranxeiras, abandonaron o país. Pola contra, 101.184 persoas (8.751 españolas e 92.433 estranxeiras) viñeron, co que o saldo migratorio foi negativo en 31.351 persoas.

Esta saída de cidadáns desde España a outros países propiciou un incremento das remesas enviadas a España, que, segundo a compañía de transferencias internacionais de diñeiro Ria Financial, rexistraría unha alza do 58%. Alemaña, Suíza, Francia e Reino Unido son os países desde onde se enviou máis diñeiro a España.