(06/06/2012)
O expresidente do centro Bergantiños xustifica a propiedade das pezas
As declaracións do actual presidente do Centro Bergantiños de Montevideo, Walter Pena, en relación a unhas pezas etnográficas doadas polo Casino de Carballo e que tiveron un paradoiro incerto atoparon resposta por parte do expresidente da entidade José María García Álvarez.
O que era presidente da entidade en 1980 cando levou o material a Uruguai asegura a través dunha carta, que eses bens, entre os que hai un carro galego, un arado romano de madeira, dúas potes e outra serie de apeiros tradicionais xa en desuso forman parte do museo que el posúe na súa casa e do que Pena e toda a colectividade de inmigrantes bergantiñáns sabe onde se atopa.
García Álvarez, que actualmente preside a Asociación Española de Primeiros Socorros Mutuos, incide en que non se considera «o único dono desas reliquias» polo que, tanto el como a súa familia, entenden que deben doalas a un museo, pero cando eles decidan.
Argumenta que moitos alcaldes de Bergantiños e Manuel Fraga tiveron ocasión de ver as pezas na súa sala de exposición caseira e que, ademais, estes bens estiveron a disposición pública no Club Español, o Centro Galego, o Centro Bergantiños e o Padroado da Cultura Galega, ademais de saír en reportaxes televisivas.
Sinala ademais, que foi el quen conseguiu e pagou esas pezas en Galicia. Despois desa compra «estiveron sete anos abandonadas nun depósito» sen que ninguén se interesase «por esas madeiras apolilladas ata agora».
Subvencións
García apunta que o propio Pena dixo que «había cousas máis importantes que facer na institución» e que se agora pregunta por eses bens é por un interese ben distinto, «unha forma de seguir recibindo subvencións», cando os galegos na diáspora deberían estar a pensar no mellor xeito de «axudar a España, cando está a pasar pola peor crise da súa historia».
Para o expresidente, o obxectivo da colección é que «non se perda a memoria histórica dos nosos devanceiros e, á vez, que sirva de exemplo a futuras xeracións en Uruguai, o país de acollida». A localización ideal sería, ao seu xuízo, o Fogar Español ou «a unificación das institucións galegas en Montevideo».
García conclúe o seu texto asegurando que o museo lle pertence e que ten probas diso. Ademais, manda unha mensaxe de tranquilidade aos españois e especialmente aos bergantiñáns e aos carballeses: «Tranquilos paisanos que o arado está en boas mans e moi pronto acabará no lugar adecuado no que todos poidan gozalo».
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas