A fiscal culpou onte a un veciño de Alfoz, L. R. F., de explotar laboralmente a un romanés que veu a España en busca de traballo que lle permitise soster á súa familia. Segundo a acusación pública, fíxoo traballar de sol a sol realizando tarefas como, por exemplo, coidar cabras, recoller estiércol, cortar leña, recoller mazás ou atender ao gando. O imputado negou os feitos, no xuízo celebrado onte en Lugo, e dixo que lle pagaba ao operario o que acordara verbalmente.

A acusación pública sostivo que o imputado, sabendo que a necesidade económica do afectado e, abusando da mesma, impúxolle unhas penosísimas condicións de traballo. Non o deu de alta na Seguridade Social, a xornada de traballo ía de oito a once da noite e unicamente permitíalle facer unha comida ao redor das cinco da tarde.

Ademais, non lle deixaba gozar ningún día libre. Supostamente advertiulle un domingo que descansou de que se volvía faltar un día ao traballo prescindiría del. Obrigábao a realizar tarefas en condicións de extrema inseguridade como, por exemplo, ir buscar gasóleo para a maquinaria agrícola levando as garrafas nunha bicicleta.

O 7 de xullo de 2009, mentres se atopaba traballando para o acusado, o romanés sufriu un accidente de tráfico. O imputado, segundo o fiscal, non lle prestou asistencia nin axuda de ningún tipo.

O acusador público reclama que lle impoñan ao empresario 12 meses de prisión e unha multa. A acusación particular, pola súa banda, eleva a pena a 30 meses e unha indemnización de 50.000 euros.

Durante o xuízo declararon varias persoas que aseguraron que viron ao afectado traballando para o imputado. Tamén foi corroborada a versión do transporte de gasóleo.

Os feitos foron cualificados penalmente como un delito contra os dereitos dos traballadores.