A Fiscalía de Estranxeiría revelou onte que detectou nos últimos sete anos detectou 30 casos de trata de seres humanos relacionada coa explotación sexual en Vigo e a súa contorna. Dous das vítimas eran menores de idade. No 2010 foron rescatadas cinco mulleres e seis casos chegaron a xuízo. Pero o Ministerio Público sinala que existe «un alto número de cifras negras» de mulleres tratadas como «servas ou escravas sexuais» que non denuncian a súa situación.

O seu perfil é o de inmigrantes que son enganadas, que están nunha situación de necesidade, ameazadas, raptadas ou sometidas a ritos de vudú e que son trasladadas desde o seu país de orixe.

A Fiscalía tamén sinala que o aeroporto de Peinador é unha vía habitual de entrada de mulleres en Galicia para exercer a prostitución. As suramericanas chegan de París con pasaporte de turista e as romanesas por estrada. As nixerianas que fan a rúa no Berbés ou en Bouzas deben pagar unha media de 6.000 euros por unha viaxe en patera cheo de perigos. «Todas estas inmigrantes ven inmersas nun traslado inconsentido ou viciado e ao chegar ao seu destino non teñen máis opción que asumir as condicións abusivas e de explotación sexual ou laboral que os seus traficantes lle impoñen», di a encargada da sección de Estranxeiría, con sede en Vigo.

A sospeita de que a bolsa de «escravas sexuais» é máis grande da que detecta a policía nos clubs débese a que «non están en disposición de denunciar por ser estranxeiras en situación irregular, as presións recibidas, o temor a represalias e a carencia de alternativas reais». Moitas calan. Os seus captadores coñecen á súa familia ou ata se trata de irmáns e xenros. A identificación das prexudicadas é difícil, pero desde xaneiro o delito está recollido no Código Penal.