(21/07/2011)
A integración dos inmigrantes "non tivo éxito", segundo comisaria de UE
20 de xullo de 2011
A comisaria europea de Interior, Cecilia Malmström, afirmou hoxe que a integración dos inmigrantes na UE "non tivo demasiado éxito ata a data", algo que ao seu xuízo debeuse á falta de oportunidades "para participar plenamente" nas comunidades de acollida.
Malström pronunciouse así nun comunicado, ao presentar un conxunto de recomendacións destinadas a mellorar a integración dos inmigrantes na UE, entre as que destaca a mellora do ensino da lingua do país de acollida e o incremento das posibilidades de emprego para os cidadáns extracomunitarios.
"Para que a integración sexa un éxito, hai que ofrecer aos inmigrantes a oportunidade de participar plenamente nas súas novas comunidades", destacou a comisaria sueca.
Como "elementos cruciais" para lograr unha boa integración, a comisaria mencionou a aprendizaxe da lingua do país de acollida, o acceso ao emprego e á educación, e "contar coa capacidade socioeconómica necesaria para manterse a si mesmos".
En opinión de Malmström, "todos debemos esforzarnos máis polas persoas que veñen", xa que "uns inmigrantes integrados supón un activo para a UE" ao enriquecer as nosas sociedades "desde o punto de vista cultural como desde o económico".
Estas recomendacións, incluídas na "Axenda Europea para a Integración dos Cidadáns de Terceiros Países" adoptada hoxe polo Executivo comunitario, pretenden en particular potenciar as vantaxes económicas, sociais e culturais que a inmigración achega á UE.
O documento salienta a necesidade de que os inmigrantes "participen plenamente en todos os aspectos da vida colectiva" e para iso destaca o papel das autoridades locais.
Na UE viven actualmente uns 20,1 millóns de persoas de terceiros países, o que supón o 4 % da poboación total, segundo datos do Executivo comunitario.
Bruxelas considera que a inmigración debe supor "unha vantaxe competitiva" para a UE e confía en que contribúa a resolver o problema da diminución da poboación activa debido ao envellecemento da poboación e á baixa taxa de natalidade dos Vinte e sete.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas