REDACCIÓN | ARTEIXO O Foro galego de inmigración presentou onte o programa de VINA Asemblea xeral galega de inmigración e emigración de retorno, que se realizará o 29 de maio baixo a lema Ninguén sobra nunha crise, na que reivindicará o achegue dos inmigrantes na crise económica. Este colectivo anunciou que a prohibición do veo no novo colexio de Infantil e Primaria de Arteixo terá unha mención aparte na asemblea, xa que provocou "un sentimento de exclusión" cara aos inmigrantes en Galicia.

O portavoz do colectivo, Miguel Fernández, esixiu á Consellería de Educación unha "solución definitiva" a este conflito, que arrincou a principios de xaneiro coa imposición dunha sanción a unha alumna musulmá por levar hiyab na aula e contravenir a norma do regulamento interno que prohibe levar a cabeza cuberta en clase.

Os erros na tramitación do expediente demoraron a solución deste conflito ata finais de curso. A menos dun mes de que acaben as clases, Educación aínda non dispón do expediente que instrúe o centro, que se mantén firme en esixir o traslado de centro da alumna, que cursa sexto de Primaria. Desde o Foro acusan á Xunta de actuar con pasividade e lembran que os pais solicitaron a escolarización da menor en Marrocos.