A familia da menor de Arteixo valora demandar ao director do colexio

O representante legal da familia da nena de Arteixo que foi sancionada por levar o veo islámico en clase estuda emprender accións penais contra o director do CEIP Arteixo, José Luis Fernández Pardo, polas súas declaracións nas que equiparaba o hiyab cun disfrace. Tamén presentarían accións penais contra a Xunta no caso de que a resolución final que adopte a inspección educativa sexa o traslado da nena a outro centro. «Son dúas opcións que estudamos en serio», indicou o avogado Iván Jiménez-Aybar.

Tamén confirmou que onte pola tarde remitiu por correo administrativo á Xunta un informe xurídico no que recorda como se desenvolveron os feitos que derivaron na polémica sobre o uso do veo e no que advirte sobre irregularidades do proceso que seguiu á decisión do consello do colexio de trasladar á nena. Desde a Consellería de Educación aclararon onte que o expediente está aberto e que os técnicos da inspección educativa están a elaborar o informe que detallará a resolución e postura final da Administración autonómica respecto diso.