A familia da alumna do veo sopesa denunciar á directiva por coaccións

A familia da alumna do veo sopesa denunciar á directiva por coaccións

"Todos sabemos que ninguén quere porse esas cousas nin disfrazarse", sostén o director do colexio en alusión ao 'hiyab' que leva a alumna e polo que podería ser obrigada a trasladarse de centro

             Patio do novo colexio de Arteixo. / fran martínez

A familia da menor sancionada por negarse a quitarse o veo na clase sopesa emprender accións legais contra a directiva do centro por suposto acoso escolar. O avogado da nena fixo pública onte unha misiva da pequena, que relata que a acusaron de facer sentir mal aos seus compañeiros por levar o veo. O director négao e carga contra a familia, á que acusa de intentar sacar réditos mediáticos dun conflito xerado por eles. A Xunta elude confirmar o traslado e di que antes revisará o expediente sancionador

ANTARES PÉREZ | ARTEIXO A familia da alumna musulmá que se enfronta a un cambio de centro por negarse a quitarse o veo na clase sopesa emprender accións legais contra a dirección do colexio de educación Infantil e Primaria Novo Arteixo por suposto acoso escolar. Así o anunciou onte o seu avogado, Iván Jiménez-Aybar, que sostén que a menor sufriu "coaccións" por parte do equipo directivo. O pai desta alumna de sexto de Primaria e o seu avogado participaron onte nun programa matinal de Antena 3 onde mostraron unha misiva redactada pola pequena na que aseguraba recibir "miradas desafiantes" e comentarios fóra de lugar do equipo directivo. "Dicíanme que facía sentir mal aos meus compañeiros", sostén a menor.

O pai lamentaba onte o mal grolo que lle fixeron pasar á súa filla ao notificarlle a sanción. "Dixéronlla directamente a ela, a min non me dixeron nada. Ela chegou a casa chorando, tremendo, pensei que lle pasou algo cos seus compañeiros", relatou.

O director do colexio, José Luís Fernández Pardo, negou onte taxantemente as acusacións da familia. É máis, o docente rompeu o mutismo dos últimos días para cargar contra a familia da menor, á que acusa de buscar a popularidade a costa do conflito.

Fernández Pardo asegura que a decisión do Consello Escolar de solicitar o cambio de centro baseouse exclusivamente na "necesidade de pór sensatez e cordura" no asunto. "Fixémolo pensando exclusivamente na nena", asegurou. O director acusou ao pai da menor, Redouane Hakim, de adoptar unha actitude agresiva co xefe de estudos do centro ao decatarse da primeira sanción á menor. " Zarandeouno do brazo", relatou o docente, que reiterou que o regulamento do centro, que prohibe levar a cabeza cuberta na aula, non ten afán discriminatorio e só pretende impor normas de indumentaria.

A pesar diso, Fernández Pardo non ocultou as súas dúbidas sobre se a menor sancionada leve o hiyab por convicción e non por imposición paterna. "Todos sabemos que ninguén quere porse esas cousas e disfrazarse", sostivo o director, tras asegurar que os propios alumnos do colexio mostrábanse sorprendidos polo suposto cambio de actitude da alumna. O director mostrouse doído polo tratamento informativo do asunto e negou que se barallou a opción da expulsión temporal da nena, a pesar de que esa foi a sanción á que apelou o representante municipal no consello escolar, Xosé Márquez, e a única que transcendeu aos medios de comunicación.

Fernández-Pardo criticou a entrevista que o avogado da alumna sancionada concedeu a este xornal, na que aseguraba remitir un escrito ao centro no que lle ameazaban cun denuncia vía penal. "Eu non recibín nada", asegura.

Non é o único que asegura haberse decatado polos medios do contido dunha carta dirixida á súa persoa. A familia da alumna sancionada aseguraba onte que aínda non recibiu a notificación do acordado no consello escolar, mentres que o colexio sostén habela enviado por burofax.