(03/03/2011)
O director do colexio de Arteixo equipara o «hiyab» cun disfrace
«Todos sabemos que ninguén quere porse esas cousas nin disfrazarse», explicou o docente, que se mostrou convencido de que o único fin deste asunto é lograr popularidade.
O director do CEIP Arteixo, José Luís Fernández Pardo, equiparou onte o veo islámico cun disfrace. «Todos sabemos que ninguén quere porse esas cousas nin disfrazarse», explicou o docente, que se mostrou onte convencido de que o único fin deste asunto é lograr popularidade.
Fernández Pardo, que negou a posibilidade de que a menor fose expulsada, tamén indicou que non recibiu carta algunha do avogado da familia en que se lle explicase que podería incorrer nun delito se prohibía á menor levar veo en clase, xa que na fotografía do seu carné de identidade aparece co hiyab.
En canto á decisión tomada polo consello escolar de trasladar á menor de centro, Fernández Pardo explicou que a comunidade educativa pensou no ben da nena e que o que se pretende é dar «sensatez e cordura» a todo este asunto. Así mesmo, tamén indicou que se remitiu un burofax con acuse de recibo aos pais.
A Xunta aclarou que xa ten nas súas mans a decisión da comunidade educativa e que pedirá ao centro o expediente disciplinario da menor para comprobar que a sanción está debidamente xustificada. No caso de que así sexa, a Consellería de Educación explicou que se verificarían as prazas dispoñibles nos colexios máis próximos e procederíase ao traslado.
Ao Parlamento
O grupo parlamentario socialista explicou onte que levará este asunto ao Parlamento onde pedirán explicacións á Xunta.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas