Os avogados piden que os menores teñan garantida a asistencia letrada

Os avogados piden que os menores teñan garantida a asistencia letrada

EFE
01/03/2011

O Consello Xeral da Avogacía Española (CGAE) pediu hoxe ao Goberno que garanta que os inmigrantes ilegais que sexan menores de idade non acompañados dun adulto teñan a asistencia dun avogado de oficio obrigatoria.

Esta é unha das principais preocupacións expresadas polo CGAE tras analizar o borrador do regulamento da Lei de Estranxeiría que a semana pasada entregoulles a secretaria de Estado de Inmigración e Emigración, Anna Terrón.

O informe da avogacía subliña a necesidade de garantir os dereitos dos menores "desde o momento da súa localización e ao longo de todo o procedemento de repatriación, incluíndo o proceso de determinación da idade e protección por desamparo".

Así, os expertos de estranxeiría do CGAE móstranse "contrarios a penalizar a un menor fillo de residentes legais con dous anos de residencia irregular" tal e como recolle o actual borrador do Regulamento de Estranxeiría.

Para os avogados, este período de carencia debería ser "eliminado ou polo menos diminuído", xa que "unha anormal actuación" dos pais non debería repercutir nos dereitos do menor, consideraron.

Outro aspecto que os avogados cuestionaron é o do procedemento para determinar a idade do menor que, na súa opinión, "deberá facerse de conformidade coa súa documentación" e, en caso de dúbida e aínda que se inicien outros procedementos para pescudala, deberá considerárselle menor.

Outros asuntos que aborda o informe do CGAE son o do procedemento preferente de expulsión, que "deberá quedar limitado aos supostos máis graves, non nos casos de mera estancia irregular", e as situacións xurídicas derivadas da irregularidade sobrevinda.

O procedemento de arraigamento laboral e familiar como vías de acceso excepcional á autorización de residencia e traballo, a migración circular e retorno voluntario e a renovación das autorizacións e residencias de longa duración son tamén aspectos que analizan o avogados.