O perfil amargo da inmigración

O perfil amargo da inmigración
Unha dominicana en paro e con dous fillos sobrevive con 100 euros ao mes en Lalín

Miguelina examina o expediente de divorcio. // Bernabé/Gutier

A crise económica e o paro golpean especialmente á poboación inmigrante, que trata de saír adiante sen apenas recursos e, nalgúns casos, compartindo pequenos pisos entre varias persoas par poder pagar un aluguer. Pero existen situacións máis delicadas; estar soa e pendente dos trámites de divorcio, con dous fillos e sen emprego. Este é o caso dunha nova dominicana que reside en Lalín e que pide á xustiza que se axilice a súa separación para poder saír do país.

AFONSO LOÑO - LALÍN Miguelina Martínez Alba ten 32 anos, dous bebés ao seu cargo e está desempregada. Esta dominicana chegou a Galicia en 1995 e dous anos despois instalouse en Lalín, onde casou e tivo dous fillos que agora teñen 2 e 3 anos aos que só a caridade dalgúns veciños permite subsistir. A moza, con nacionalidade española, malvive cunha axuda da administración de 426 euros mensuais que deixará de percibir a mediados de xaneiro. Desa cantidade debe reservar preto de 350 euros para o aluguer do piso no que vive soa cos seus nenos, aínda que por agora a xenerosidade dos seus caseiros permitiulle que non tivese que abonar, en varias ocasións, a renda íntegra.
Miguelina só reclama un emprego e non quere vivir da caridade, aínda que recoñece que "sacar adiante aos meus dous fillos é imposible. Só pido un emprego, do que sexa porque ás veces non teño nin para darlle aos meus nenos para comer", relata.
Pero a súa situación, xa de seu traumática, agrávase debido a que está en trámites de divorcio da súa parella, que lle impide marcharse ao seu país natal cos seus pequenos para emprender alí outra nova vida. "Pido á xustiza que axilice os trámites e á xuíza que leva o meu caso -desde novembro do ano pasado- que entenda como muller ou como nai a miña situación", prosegue.
Miguelina Martínez sinala que a obtención da separación legal permitiríalle ingresar unha pensión estimada de 600 euros, que ata estaría disposta a negociar coa sua ex parella. "Se non pode que, polo menos, páseme unha parte", sinala e di que acudiu fai meses a pedir axuda ao departamento de Servizos Sociais de Lalín para a procura dun traballo.
Mentres tanto, trata de afrontar unha crúa realidade "sen familiares que poden apoiarme, porque aquí non teño a ninguén", di, con pouco máis de 100 euros ao mes.