Entrevista a unha mediadora intercultural e inmigrante en España

Entrevista a unha mediadora intercultural e inmigrante en España 

24 setembro, 2010 

Os nosos compañeiros de Si Se Pode, o xornal da integración, entrevistaron á mediadora intercultural Naziha Ao Idrissi, que explica así a súa tarefa en favor dos demais.

Muller, nai, inmigrante e traballadora son algunhas das palabras que defi nen a Naziha Ao Idrissi, que chegou a España no ano 2000 logo de licenciarse en Dereito pola Universidade Mohammed I de Oujda. Esta marroquí quería ser xuíz desde moi novo, "pero cando te casas e quédaste embarazada, dáste conta de que existen máis posibilidades de facer realidade o teu soño en España", di a Si Se Pode. Esta marroquí procedente de Alhucemas tiña moi claro que nacera para pór a súa vida ao servizo dos demais. "O máis gratificante de ser mediador intercultural é saber que estás axudando a outras persoas", explica sorrindo. Con todo, ela sempre foi consciente de que as cousas non serían fáciles e que tería que ser moi perseverante para conseguir os seus obxectivos.

Desde que se instalou en España xunto ao seu marido e os seus dous fillos continuou coa súa formación académica, o que lle permitiu entrar en contacto con numerosas asociacións e personalidades que traballan a disposición da integración sociolaboral dos inmigrantes. "A preparación e traballar cos cidadáns como persoas, non como números, é básico", afirma. Mediadora intercultural, a Naziha cústalle atopar unha definición de mediador intercultural, pero ten claro que "debe ser alguén que saiba gañarse a confianza das persoas e que non espera o final do mes unicamente para cobrar, senón que ten interese real polos inmigrantes". Naziha leva exercendo profesionalmente como mediadora intercultural tres anos, pero xa en Marrocos creara unha asociación chamada Forum deas Femmes que daba formación e apoio ás mulleres marroquís. Na actualidade, forma parte dun proxecto da empresa Delfo que conta co respaldo da Dirección Xeral da Muller, prestando apoio psicolóxico a mulleres e nenos vítimas da violencia doméstica. "Realizo tarefas de tradución e interpretación, así como de asesoramento xurídico. O noso obxectivo é o desenvolvemento laboral e a formación", explica. Considera que unha boa coordinación coas entidades públicas é fundamental para desenvolver un bo traballo. "Desde a Administración teñen que derivarnos aos inmigrantes que necesiten apoio ou que non teñan un bo nivel de español", sinala. "Ademais, recomendo aos inmigrantes que exploten ao máximo todos os recursos que existan nas súas cidades, que cada vez son máis e a maioría gratuítos", conta. Pero Naziha cre que é o propio mediador cultural quen debe saír a buscar aos inmigrantes que necesitan calquera tipo de axuda, apoio ou asesoramento. Camiño á integración Recorda o complicado dos primeiros meses en España -"o período de adaptación sempre supón un camiño difícil"- e sinala que, "recentemente chegada, as asociacións pídenche unha serie de requisitos que moitos inmigrantes non poden afrontar, nin económica nin psicoloxicamente".