Os inmigrantes evitan un drástico esborralle do padrón de Galicia

Galicia non entrará este ano en números vermellos demográficos grazas á achega poboacional que propicia a chegada de inmigrantes. O avance do padrón municipal que se está confeccionando cos datos obtidos a 1 de xaneiro do 2010 indica que a comunidade galega ten agora 722 habitantes máis que o ano anterior, pero tamén que foron 2.585 os estranxeiros chegados nese tempo á comunidade. Sen esa achega exterior Galicia perdería 1.863 residentes durante o pasado exercicio, situación inédita nos últimos doce anos, salvo por unha lixeira diminución rexistrada no 2004.

As proxeccións feitas polo Instituto Nacional de Estatística, (INE) -organismo que onte publicou o avance do padrón do 2010- advirten desde fai varios exercicios de que Galicia entrará sen remedio en declive poboacional a partir do 2010, algo que non poderá evitar nin o continxente de novos residentes chegados desde o exterior. De feito, entre os dous últimos anos produciuse tamén unha caída no número de inmigrantes empadroados na comunidade, xa que no anterior padrón consignouse a alta de nada menos que 7.976 estranxeiros máis que nesta ocasión.

Poboación total

Coa suma de nacionais e foráneos Galicia conta agora con 2.796.811 habitantes, un 0,02% máis que hai un ano. A provincia da Coruña suma un total de 1.146.044 residentes empadroados (556 máis que o ano anterior); Pontevedra é a demarcación que máis crece e sitúase en 962.357 veciños (2.593 máis que no exercicio precedente), mentres que a outra cara da moeda ofrécena Lugo, cuxa poboación cae a 353.251 (1.944 menos) e Ourense, que se sitúa en 335.159 (483 menos).

O colectivo inmigrante, pola súa banda, ascendeu ata 109.222 residentes, reflectindo un aumento do 2,4% e converténdose dito grupo no 3,9% da poboación total da comunidade. As raíces exteriores aumentan aínda máis se se teñen en conta aos 105.016 descendentes de galegos e españois que agora residen na comunidade pero que naceron no estranxeiro, fundamentalmente froito da emigración.

Portugal achega a maioría dos residentes nacidos no estranxeiro, con 26.059 empadroados, seguido de Venezuela, con 20.966; Suíza, 17.704 (en ambos os casos polo citado efecto da emigración); Brasil, 16.707; Arxentina, 16.443, e Colombia, con outros 11.415 residentes, mentres aumentan colectivos doutros enclaves como Romanía, que xa teñen en Galicia 6.939 e Cuba, que suma outros 6.919.